الموضوع: غزل من نوع خاص

هذه كانت محاولتى لكتابة شعر ولكن للاسف
فشلت كعادتى واقتنعت أخيرا بأننى ليس لدى موهبة
الشعر ولكنى نويت ان احقد على كل من يمتلك هذه
الموهبة
واليكم محاولتى لكتابة الشعر ووجدتها بعد انتهائى
منها لا تصلح بأن توضع فى قسم الشعر والنثر
ملحوظة اول بيت ليس من تأليفى ولكن عندما سمعته
أعجبت بالفكرة وحبيت انى أكملها
(كفاية كلام كتير بقى):

حبيبتى دعى العبير على الشعر يتهدى
ومتشليش الاكل من ادامى أنا لسه بتغدى
حبيبتى أنتى كالعصفور الصغير فى العش
وياريت تسيبينى اتفرج على الماتش
حبيبتى أنا أسير رمشك وعيونك
وياريت تدينى أتكلم من تليفونك
حبيبتى أنتى الطبيب وأنتى الدوا
وياريت وأنتىخارجة تشحنيلى على الهوا
حبيبتى ستكونين نبراسى طوال الشهر
وفين ياهانم مرتب الشهر
حبيبتى أنتى فى نظرى ملكة جمال
وياريت تسبينى أكمل قراءة الجرنال
حبيبتى دعينى أضعك على رأسى لتكونى تاجى
وياريت تكويلى قميصى وبنطولنى الباجى
حبيبتى صوتك يشبه زقزقة العصفورة
ومين بقى ياهانم هيدفعلك الفاتورة
حبيبتى.حبيبتى.حبيبتى

ههههههههههههههههه
تحفه بجد ياصدفه

واللهى رائعة يا صدفتنا السعيدة وانتى بجد شاعرة موهوبة

جميلة جدا جدا .... دي بتعتبريها محاولة فاشله !!!!!!!
اكتبي واتركينا نحن نحكم ...علي هذه المحاولات الرائعة ....

جميلة جدا و مولد مدرسة جديدة في الشعر
بجد ممتعة
تحياتي

السلام عليكم

محاولة حلوة , و دمك خفيف
واصلي اُخت صدفة
عشان تسعدينا


تحياتي
ممنوع من الصرف

هاهاهاهاهاهاهاهاهاها
ده انتى معجزه اكتبي تاني ولو محدش قرا انا هاقرالك ولا انا مش كفايه ؟؟
على العموم اسلوبك محصلش فيه خفه دم الشعب المصري انتى بنت مصريه بجد تسلمي
حبيبتي اوعدك هاجبلك جزمه وشنطه
بس ياريت بلاش في الاكل تحطي الشطه

0

ههههههههههههههههه لذيذه بجد
ودمها خفيف جداااااااااا
أمتعينا بالمزيد

ههههههههههههههههههههههه
ايه الروائع دى ما شاء الله
فعلا تاميكوم مولد مدرسة جديدة فى الشعر !!
حلوة بجد والله
يا صدفه سعيده
فى شعر كتير واسمه شعر كما ينبغى وبيبقى حاجة(خنقه)
بس دى اى كان اسمها روووووووووووووووووعه
واعتبرينى من قرائك الذين يتلهفون
لمثل هذه القصائد (الانتيكة)

رائعه
بجد والله جميله اوى اختى صدفه
ياريت تفضلى بنشر مثلها فهى بجد تحفه ولذيذه

المشاركة الأصلية كتبت بواسطة نهله

جميلة جدا جدا .... دي بتعتبريها محاولة فاشله !!!!!!!
اكتبي واتركينا نحن نحكم ...علي هذه المحاولات الرائعة ....

شكرا يانهلة على رأيك
وأنتوا اللى جبتوه لنفسكوا
من هنا ورايح هشبعكوا
من محاولاتى الفاشلة

أحب أشكر كل اللى علق على هذه
المحاولة مش هقدر أقول عليها شعر
1_جيهان
2_أبو مريم
3_نهلة
4_سلوى
5_ممنوع من الصرف
6_مريوم أحمد وعجبنى
البيت اللى انتى كتباه فى
الاخر أجبلك شنطة ومتحطيش
شطة أنتى كده هتنافسينى
ولا ايه رأيك ما تيجى نبنى
المدرسة الشعرية
الجديدة دى سوا وأهو ننافس أبوللو
7_سيلنت شكرا يااختى على رأيك
8_أحمد شكرا على رأيك بس عندى سؤال
(الانتيكة) دى مدح ولا ذم
9_وختامه مسك سوعة شكرا جدا على رأيك
وفعلا أنا متوقعتش رد الفعل ده انا تخيلت ان الادارة
أكيد هتدينى عقوبة ولا حاجة

المشاركة الأصلية كتبت بواسطة صدفة سعيدة

8_أحمد شكرا على رأيك بس عندى سؤال
(الانتيكة) دى مدح ولا ذم

مدح طبعا
الانتيكة معناها التحف القديمة وهى التحف ذات القيمة العاليه
مسمعتيش الكلمة دى قبل كد خالص (مفرد انتيكات)
وكذلك ابيات الجميلة حاجة محصلتش
وبعدين روقى (انتى هتقلبيها خناقه ولا ايه)

المشاركة الأصلية كتبت بواسطة احمد

مدح طبعا
الانتيكة معناها التحف القديمة وهى التحف ذات القيمة العاليه
مسمعتيش الكلمة دى قبل كد خالص (مفرد انتيكات)
وكذلك ابيات الجميلة حاجة محصلتش
وبعدين روقى (انتى هتقلبيها خناقه ولا ايه)

............................................
لا خناقة ولا حاجة يابشمهندس
أحمد دى كانت مجرد مزحة
يعنى حضرتك مشفتش
الابتسامة جمب السؤال
وبعدين ازاى تسأل شاعرة
موهوبة وبتبنى مدرسة جديدة
فى الشعر أنها متعرفش
الانتيكة يعنى ايه
أكيد عرفاها روبابيكيا يعنى

وعلى فكرة دى مزحة كمان

فعلا رائعه .....
رائعه لابعد حد ...

جميل خفة الظل فى هذه القصيدة ولكن أتمنى لو تحاولين الكتابة باللغة العربية الفصحى ولو مجرد محاولة نتمنى أن نقرأ لك شعرا فصيحا وفى إنتظار الجديد والطريف

جميل خفة الظل فى هذه القصيدة ولكن أتمنى لو تحاولين الكتابة باللغة العربية الفصحى ولو مجرد محاولة نتمنى أن نقرأ لك شعرا فصيحا وفى إنتظار الجديد والطريف

احب اعقب تانى على كتاباتك اخت صدفة رايى ان كتاباتك بالعامية ليها طعم ولون ورائحة مختلفة وامتعتينا جدا بهذا الاسلوب وارجو انك تستمرى كدة ومتكتبيش بالفصحى

المشاركة الأصلية كتبت بواسطة الظاهر بيبرس

جميل خفة الظل فى هذه القصيدة ولكن أتمنى لو تحاولين الكتابة باللغة العربية الفصحى ولو مجرد محاولة نتمنى أن نقرأ لك شعرا فصيحا وفى إنتظار الجديد والطريف

شكرا أخى الفاضل على رأيك ولكن عندى تحفظ
بسيط على موضوع الكتابة باللغة الفصحى
لأنى وجدت النصيحة هذه فى أكثر من موضوع
أنا رأيى الشخصى اللغة الفصحى هى لغة راقية
تتميز بالاصالة وهى لغة القرأن الكريم
هذا الكلام لا جدال فيه ولكن اللغة العامية
هى لغتنا اليومية اللى بنتعامل بيها فى
حياتنا العادية يعنى حضرتك لو رئيسك
كان بينادى عليك هترد عليه وتقوله
لبيك سيدى شوف رد فعله كده هيكون
ايه أكيد متوقع
يبقى نكتب باللغة العامية اللى بنستخدمها
فى حياتنا العادية
وممكن أسأل حضرتك سؤال
تانى لو أنت قدامك عربية من
الطراز القديم تتميز باالاصالة
وعربية هامر أحدث موضة
هتركب أى واحدة فيهم
وأحب أضيف كمان حاجة
أنى الكاتب صلاح جاهين
فى رباعياته كان بيكتب
بالعامية وعلشان كده كانت قريبة
من الناس أكتر وغيره كثير من كتابنا
الاجلاء أعذرونى ياجماعة فى رأيى ده
وهو مش تقليل من اللغة الفصحى أبدا
أنا مقدرش أقول كده بالعكس أنا بحب
أكتب باللغة الفصحى وأانا عارفة
انى فيه كتير هيعترضواعلى رأيى بس ده
وجهة نظر

المشاركة الأصلية كتبت بواسطة ابومريم

احب اعقب تانى على صدفةرايى ان كتاباتك بالعامية ليها طعم ولون ورائحة مختلفة وامتعتينا جدا بهذا الاسلوب وارجو انك تستمرى كدة ومتكتبيش بالفصحى

شكرا أخى الفاضل على رأيك فهو تاج فوق رأسى
وعلى موضوع الفصحى انا هنوع فى كتاباتى
مرة بالفصحى ومرة بالعامية علشان
أرضى جميع الاذواق بما أننى بقى بقيت
كاتبة مشهورة كده يثير حواليها الجدل

المشاركة الأصلية كتبت بواسطة صدفة سعيدة

ولكن اللغة العامية
هى لغتنا اليومية اللى بنتعامل بيها فى
حياتنا العادية يعنى حضرتك لو رئيسك
كان بينادى عليك هترد عليه وتقوله
لبيك سيدى شوف رد فعله كده هيكون
ايه أكيد متوقع

اضحكني التعليق جدا ... و خصوصا "لبيك سيدي" ... و بالقطع سيكون رد رئيسه " خمسين يوم خصم من المرتب مع الرفد .. آل لبيك سيدي آل " ...

انت اضافه رائعه لمملكتنا يا صدفه ... و مشاركاتك تنشر البهجه و الابتسامه ...

و لا تنسي نصيحة بيبرس الدائمه

اكتبي بالفصحي

أضحكتنى جدا

حبيبتى أنتى الطبيب وأنتى الدوا
وياريت وأنتىخارجة تشحنيلى على الهوا

جميلة جدا

المشاركة الأصلية كتبت بواسطة محمد

اضحكني التعليق جدا ... و خصوصا "لبيك سيدي" ... و بالقطع سيكون رد رئيسه " خمسين يوم خصم من المرتب مع الرفد .. آل لبيك سيدي آل " ...

انت اضافه رائعه لمملكتنا يا صدفه ... و مشاركاتك تنشر البهجه و الابتسامه ...

و لا تنسي نصيحة بيبرس الدائمه

اكتبي بالفصحي

أسعدنى تعليقك جدا يا سيادة الرئيس
وموضوع الكتابة بالفصحى
أنا فعلا بكتب بالفصحى ولكن فى حالات
لا ينفع الكتابة بها الا باللغة العامية
مثل موضوعى هذا وأشكر حضرتك
مرة ثانية

المشاركة الأصلية كتبت بواسطة nadonido

أضحكتنى جدا



جميلة جدا

شكرا يانادو على رأيك
وبالذات لما يكون من شخصية جميلة مثلك