الموضوع: النظاره السوداء(ومش فيلم ناديه لطفي)

هي ازاي سايبه عيالها مبهدلين كده؟ الاسم امهات وخلاص!!
ازاي ثم ازاي بيرد على والداته بالطريه الوقحه دي ؟عيال اخر زمن!!
معقول فى وحده تسيب بيتها وجوزها وعيالها وتنزل تشتغل عشان تحوش؟ناس محوشتيه هيموتوا على القرش!!
هو اخويا الافندي هيفضل على طول رايح ورا مراته على بيتها اهلها على طول؟زي ما يكون معندوش اهل يسال عليهم!!
هو انا كل ما احب اخرج مع جوزي لازم اخوه الصغير يشبط؟طب هو صغير ومش فاهم بابه ومامته برضو مش صغيرين؟!
مش عارفه اختى الكبيره ازاي قاعده وشعرها منكوش كده قدام جوزها؟المفروض انها قدوتنا وبتعلمنا مثال مش مشرف خالص!!
يا سلام على الحكاوي ياست نهله ياصحبتي خلاص بقى عندك زمايل رجاله فى الشغل وبتكلميهم عادي كده؟انا لازم اقطع علاقتى بيها قبل ماتشوه سمعتى بتصرفاته الانفتاحيه دي!!
كتير هى الانتقادات اللى بتوجهها ناهد لطفي للناس اللى حواليها بس فى بالها يعني بينها وبين نفسها,طول الوقت عندها تعليق وانتقاد لاذع على كل حاجه عينيها بتقع عليها ومفيش امل انها تتغير او تتخلص من طبعها ده.
وده يوم عادي فى نظرنا لكن فى نظر ناهد لطفي مش عادي لانها رايحه تحقق حلمها و تشتري النظاره الشمسيه الماسك اللى بتلزق على الوش وبتبلعه وعامله زي زجاج العربيه الامامي بس موضه وكل المغنيات لابسينها فى كليباتهم الجديده وحلوه عليهم ومش حلوه علينا؟!!!!!
هما عاملين شعرهم ومكياجهما عند اشهر كوافير,واحنا عاملينه على التسريحه فى اوضه نومنا
هما لابسين هدوم من عند اشهر مصممين الازياء فى العالم واحنا اشيك طقم جايبينه من عباس العقاد
هما بياكلو زبادي لايت عشان يحافظوا على رشاقتهم واحنا بناكل طعميه ومخلل عشان نشبع ونستطعم
انا اقتنعت بس ناهد لطفى ما اقتنعتش واللى فى دماغها فى دماغها واشترتها وبغض التظر عن انها مش حلوه عليها لما كانت بتلبسها ماكنتش بتسمع كويس لانها عمرها ما لبست نظاره شمسيه قبل كده,فكانت بتحس ان ضوء الشمس بيتحجب والاصوات اللى حواليها كمان هي حاله نفسيه تخصها هي بس متقلقوش.
المهم لما لابستها ناهد لطفي قدام المرايه شافت اللى عمرها ماشافته في حياتها واللى فاجاءها جدا

شافت نفسها وهدوم عيالها مكرمشه وعايزه تتكوي وهى مكسله تكويهم, وحجتها انها غسلتهم ونضفتهم وكده كفايه.
شافت نفسها تاني يوم العيد وهي بتلوم والدتها باسلوب يخلو من الادب عشان بعتتلها اللحمه مع اختها الصغيره ومجاتش بنفسها مع انها كانت مريضه,وحجتها انها كانت متنرفزه ومخدتش بالها من صوتها العالي وكلام الغير لائق.
شافت ازاي انها مبتفكرش غير فى انها تروح لاهلها وتعزمهم عندها ومبتفكرش تقول لجوزها تعالى نروح لاهلك,وحجتها هو لو افتكرهم وحب يروحلهم انا مش هاعارض يعني انا هاكون ملهوفه عليهم اكتر منه.
شافت ازاي بتنضف بيتها كويس قبل ما مامتها تيجي تزورها ومبتفرقش معاها جوزها الغلبان يجي من الشغل يلاقي بيتها نضيف,وعذرها ان مامتها هتعلق وجوزها مابيدققش
شافت كام مره كان بيبقى نفسها لو اخوها وهو خارج مع مراته يقولها تعالي معانا ,وحجتها ان مرات اخوها بتحبها وبتحب حكاويها فامش هتبقى تقيله عليهم
فى الساعة دي ناهد لطفي شافت حاجات كتير ومواقف كتير عمر عينيها المنتقده ما وقعت عليها ولا وجهتلها لوم وعتاب حتى بينها وبين نفسها
وبسرعه قلعت ناهد النظاره وعرفت ان السر كان فيها وفى عدساتها السوده هى اللى كشفتلها حقيقتها اللى ماكنتش بتشلغها ابدا قد ما كان بيشغلها تكتشف حقيقه الاخرين
انا قولت من الاول النظاره مش لايقه عليك يا ناهد لطفى سيبيها لهيفاء وهبي هي اولى بيها

هههههههههههههه

موهوبه يا مريوم

جميلة ورائعة يامريوم
بجد بتحكى عن خصلة فى أغلبيتنا
ممكن طلب يامريوم؟
هى النظارة السوداء دى بتتباع فين
علشان أجبها لناس كتير علشان
يشوفوا حقيقتهم
ومتقلقيش هبقى أسيبها لهيفا فى الاخر

والللهى القصه كويسه بس ايه الفرق بين ناهد لطفى وناديه لطفى مش مشكله نتمى لكى المزيد من التقدم بس انا عارفه اانك عندك قصص احلى من دى ياريت تكتبيها

للمره الثانيه تطل علينا الاخت مريوم بقصه فلسفيه عميقة المعني ... تحمل هدفا و فكرا ...
و للحق يقال ... فهذا الاسلوب هو من اعلي طبقات كتابة القصه ... و ينقص اديبتنا الرائعه ان تكتب باللغة الفصحي لاضمن لها انها ستكون في مصاف الكبار اذا التزمت هذا الخط الفلسفي العميق ... مع ذلك الخيال الخصب و السهوله في التعبير ...

و لكي نشرح القصه - من وجهة نظري و للكاتبه حق النقد و التعديل - للساده الذين التبس عليهم الاسلوب نظرا للهجه العاميه الكثيفه و كثرة "الاكسبرشنس" المصريه .... فالقصه تتحدث عن شخص لم يرض بالمستوي الذي يعيش فيه و لم يحاول ان يرتقي الي المستويات الاعلي بالجد و العمل و انما تمسك بالمظاهر المتمثله في النظاره الشمسيه التي يريد ان يقتنيها ... التي ما ان ارتدتها تلك السيده حتي اكتشفت انها لا تليق مع باق مفردات حياتها "المكرمشه" شكلا و موضوعا ...

ستدفعينني دفعا يا سيدتي ... ان اخلع لك قبعتي تقديرا لهذا الاسلوب الادبي المتطور .... و سنكون علي اهبة الاستعداد ان نمنحك وسام الكاتب المتميز مع المحاولة الثالثه التي آمل ان تكون بالفصحي حتي و لو كانت صعبه .. الا انها هامه ... و مهمه ...

تحياتي العطره و الي الامام

اتفق تماما مع / سيدى الرئيس
فكتابات( مريوم ( دائما تحمل معنى وقيمة مهمة فى حياتنا
ورغم الاقناع الذى يوجد فى العامية احيانا الا ان الكتابة بالفصحى مهمة فعلا
تحياتى الى مريوم
وسؤال يلح على هل (مريوم) بهذا الشكل مقصودة ام انه (مريم) وفى الامر خطأ املائى غير مقصود اثناء التسجيل
واصبح امر واقع؟؟

القصة مش بطالة يا مريوم بس انا شايف ان شنطة فرغلى كانت افضل وانا مع الاختrnonalasolانك عندك افضل من كدة لانك موهوبة وخيالك خصب وليكى رؤية فلسفية

شكرا يا رنون على مرورك الكريم وان شاء الله اوعدك بالافضل

شكرا يا اخت يا سحر وبعيدا موهوبه ايه ده انتى اللى موهوبه
وشكرا كمان لابو مريم وبوعدك المره الجايه تكون احسن المرتين اللى فاتوا
ولصدفتي السعيده برضو شكر كبير وعلى فكره انا مش عارفه النظارات دي بتتباع فين ولو عرفت هاشتري منها استوك كبير اوي

شكرا جدا ياسياده الرئيس على الكلام الجامد ده اللى بيحفزني على الاستمراروهاحاول اني اكتب بالفصحى بس مش وعد.
اما عن فهم حضرتك للقصه فهو صح بس فى حته كمان ان بطله القصه زيها زي كتير منا وممكن حضرتك تقول اغلبيتنا لما بنشوف غيرنا بيغلط بنتتقده ولا نتاخذ له اعذار لكن لما حد يواجهنا ويقولنا ان احنا لنا نفس الاخطاء بنقدر نلاقى لنفسنا الف عذر والحد ده هنا مثلته فى النظاره الشمسيه.
وشكرا تاني على تشريفك ليا بقراءة قصتي المتواضعه

شكرا يا اخ احمد لقراتك قصتي المتواضعه وساحاول فى موضع الفصحى ده
اما بالنسبه لموضوع مريوم احمد فانا كتبته وانا فى كامل قواي العقليه:d
لان مريم ده اسم ابنتي الصغيره ولاني بحبها جدا بحب استخدم اسمها اكتر من اسمي ومريوم(هو تصغير مريم)
واحمد هو اسم والداها وهو وبنتي هما اهم اتنين فى حياتي فلذلك بحب تكون اسماهيم ديما قدامي وبحب برضو اشوف اسم زوجي هو اب(يعني يسبقه اسم)
يارب يكون توضيحي رد على استفسار حضرتك

بصراحه قصه رائعه واسلوبها رائع بس انا مش مع انك تكتبى بالفصحه لان احلا مافي القصه انها بالعاميه هو اللي مخلي في اقبال وعنوانها مثير
بس في سؤال هل انتى تقصدى بيها حد تعرفي انا اعتقد ذلك وللامام دائما

قصة رائعة جداااا

و فيها معنى عميق ... و الحقيقة الكتابة باللغة العامية ممكن تكون صعبة فى القراءه شوية ، لكن سهلة فى الفهم
و خفيفة على القلب...

شخصيا أحبها ...

شكرا مريوم

و الله ما فهمتها الا من شرح الرئيس محمد
بس بحييكي بشده بشده
واضح انك مشروع اديبه (بالعاميه)
بس اللغه العربيه الفصحي مهمه عشان السوريين من امثالي يفهموا

المشاركة الأصلية كتبت بواسطة نوده010

بصراحه قصه رائعه واسلوبها رائع بس انا مش مع انك تكتبى بالفصحه لان احلا مافي القصه انها بالعاميه هو اللي مخلي في اقبال وعنوانها مثير
بس في سؤال هل انتى تقصدى بيها حد تعرفي انا اعتقد ذلك وللامام دائما

انتو كده حيرتوني اكتب بالعاميه تقولوا اكتبي بالفصحى
اكتب بالفصحى تقولوا لا اكتبي بالعاميه
عموما عشان خاطرك يا نوده010 (مع إني مش فاهمه اهميه 010) هاكتب بالعاميه

واللهى يا نادو انتى اللى خفيفه على القلب
مش بقولك انتى سكر
شكرا على مرورك المميز

و الله ما فهمتها الا من شرح الرئيس محمد
بس بحييكي بشده بشده
واضح انك مشروع اديبه (بالعاميه)
بس اللغه العربيه الفصحي مهمه عشان السوريين من امثالي يفهموا مرحبا خيو جورج
وااله نور المنتدى فيك
ولا يهمك بكره بعملك قصه بالسورى كرمالك وكرمال اهل سوريا الغالين عيوني الكن

جميلة جدا حبيبتى
دعوة اخلعوا النظارة السوداء
جزاكى الله كل خير

جامدة جدا
ولها مغزى
مشروع اديبة تمام
بس اللغة العربية الفصحى
هى الاساس