الموضوع: عايزة اتجوز!!!

صرخة 9 مليون بنت مصرية

حرااااااام ياناس فين الانسانية


أيوة ياعالم عايزة أتجوز

خايفة ياناس لأحسن أعنس

خايفة تقولوا عليا كبرت

خايفة تقولوا عليا أنا بورت

خلاص ياعالم من وحدتي زهقت

نفسي يابابا ألبس طرحة وفستان

وأقعد في الكوشة والزغاريد تملى المكان

وعريسي ملو هدومه ويكون عليا ولهان

ومستعدة يابابا أجيب الشقة والشبكة كمان

عمالة أحلم وبحلم وتقريبا فات الأوان

خلاص يابابا قربت يجيلي جنان

ما هو تلاتين سنة عدت في الحرمان

نفسي يابابا أسمع كلمة فيها حنان

نفسي يابابا فى نظرة إعجاب

نفسي يابابا حد يدق الباب

يارب أي عريس ان شاالله بواب

نفسي أتسأل من وكيلك يوم كتب الكتاب

نفسي أتجوز أي جوازة والسلام

وأهو أسمي أخدت لقب مدام

وأخلص بقى من كتر الكلام

ومن كل اللي يشوفوني ويقول ياحرام

البت عدت التلاتين ولسه متجوزتش

ياعيني دي داخلة على 31 ولسه متأهلتش

خلاص يابابا انتهيت ولا لسه منتهتش!!

ده كل عيد ميلاد بطفي الشمعة وبتمنى

أني أتجوز ويبقى ليا عيال وأتهنى

وتعدي سنة ورا سنة وأنا لسه بستنى

تقريبا يابابا قطر الجواز فات

وعدت عليا كل المحطات

خلاص مبقاش غير الآهات

وأني أقبل لقب عانس من سكات

وأستحمل بقى كل اللمزات

وكلام الناس والتلميحات

ما هو أنا زيي ملايين البنات

أروى وخديجة وماري وزينات

ما هو العنوسة بقت دلوقتي أكبر الآفات

ليه بس كده
دانتى لسه صغنتوته
كلام جميل
يعبر عن واقع اليم
بس تفتكرى ممكن فى اى وقت تقولى اى جوازه والسلام
لا اعتقد
وخاصة من كتر التجارب حواليكى
؟؟؟

كلام جميل ....نقراه يحزن القلب ...على الشباب ......هنقول ايه حسبنا الله ونعم الوكيل فالى خلوا كل حاجه نااااااااااار مفيش فى ايدينا حاجه نعملها لا لينا و لأخواتنا البنات الى زى حاله البنات الى بتحكى عليهم .....بجد حسبنا الله ونعم الوكيل.

جميلة يا سارة الحقيقة
بس أنتى عارفة رأى فى موضوع الجواز دة .... زى ما دكتورة فاطمة قالت ، صعب تبقى جوازة و السلام !!

لان للأسف فيه بنات بتفكر اليومين دول انها تتجوز و إنشالله تطلق بعد شهر ، و تأخد لقب مطلقة أحسن من لقب "عانس"
و لا تدرى أنها بتجنى على "زوجها" و على أولادها لو فيه أولاد و على المجتمع كله ... لان الأسرة اللى هى نخاع المجتمع بتبوظ ...


انا شايفة المشكلة اللى خلت البنات تفكر أنها تتجوز و السلام - و تخرب الدنيا بعدها - هى النقطة دى :

المشاركة الأصلية كتبت بواسطة صدفة سعيدة

وأستحمل بقى كل اللمزات

وكلام الناس والتلميحات

لأن فعلا المجتمع لا يحترم ظروف كل بنت أو قرارتها ... و لكنه دائما ما يجرحها باللمزات و التلميحات كما قلتى يا سارة ...

فتلجأ الفتاه للزواج و خلاص و أهو نص الجوازات بقت بتفشل ، فبالنسبة لها أرحم من نظرات الناس لها كعانس...

بس أوعى يا سارة تتجوزى و خلاص

ومستعدة يابابا أجيب الشقة والشبكة كمان

ههههههههههههههههه
دة إنتى عروسة لقُطة
بس جدعة تخليكى على كلامك
تحفة بجد ياصدفة .. خفة ظلك رهيبة
حبى كله ليكى

المشاركة الأصلية كتبت بواسطة صدفة سعيدة

نفسي أتجوز أي جوازة والسلام

وأهو أسمي أخدت لقب مدام

وأخلص بقى من كتر الكلام

جميل قوي كلامك وخفه دمك
فعلا في بنات كل المشكله عندها في الناس وكلامها يعني الموضوع في حد ذاته مش ازمه بس الناس ولكن مش للدرجه دي تحياتي لكي

ماشاء الله عليكى ذهنك حاضر دايما والقصيدة ملمة بأبعاد الموضوع ..مسبتيش نقطة
لمزيد من التألق دائما
وربنا يكرمك يا رب
ونشوفك شاعره كبيييييييييييييييييره جدا

المشاركة الأصلية كتبت بواسطة احمد

ماشاء الله عليكى ذهنك حاضر دايما والقصيدة ملمة بأبعاد الموضوع ..مسبتيش نقطة
لمزيد من التألق دائما
وربنا يكرمك يا رب
ونشوفك شاعره كبيييييييييييييييييره جدا

ونشوفك عروسة برده يا سارة
قريبا:d

المشاركة الأصلية كتبت بواسطة dr\fatma

ونشوفك عروسة برده يا سارة
قريبا:d

ده شىء بديهى طبعا !!
ربنا يكرمكم جميعا باذنه تعالى

اين حسن الظن بالله
وصلاة قضاء الحاجه
وكثرة الاستغفار
فيجعل الله لكن من كل ضيق مخرجا
ياسر شعيب
مصر
لكم منى اغلى تحية
الأخوه فى الله

كلام حلو يعنى جر رجل وساعه الجد الشبكه بكام والمهر كام والشقه فين وازاى ووووووووووووووو والى اخره ربنا يرزقك بل الزوج الصالح المناسب وما تكونش جوازه والسلام وماتنسيش تعزمينا

المشاركة الأصلية كتبت بواسطة Dr\fatma

ليه بس كده
دانتى لسه صغنتوته
كلام جميل
يعبر عن واقع اليم
بس تفتكرى ممكن فى اى وقت تقولى اى جوازه والسلام
لا اعتقد
وخاصة من كتر التجارب حواليكى
؟؟؟

اه لسه صغنتوته خالص
بصي يابطوط البنت كل ما بتكبر في السن بتبدأ تتنازل عن مواصفات فتى الأحلام
يعني لما تكون لسه في العشرينات تبقى عايزة الوسيم اللي عنده عربية وشقة ويكون مهندس أو دكتور ويكون غني (بتحلم) بعد كده أحلامها بتقل سنة بسنة لحد لما تتدخل في التلاتيينات وما أدراكي ما التلاتينات تبدأ تتنازل عن مواصفات فتى الأحلام ويمكن تقبل أى فتى بس مش هيكون
فتى أحلام خالص ياأما عجوز ومكحكح ياإما متجوز خمسة قبلها
وهلما جرة ( هي دي الجوازة والسلام) وده كله علشان تخلص من التلميحات وكلام الناس ونظراتهم اللي مبترحمش ده واقع والكل عايشه وفيه ملايين البنات بتضطر لكده
صح ولا أنا غلطانة
يااااااارب ما أتنازل أبدا عن مواصفات فتى الأحلام وأقبل أي جوازة والسلام

المشاركة الأصلية كتبت بواسطة complexman

كلام جميل ....نقراه يحزن القلب ...على الشباب ......هنقول ايه حسبنا الله ونعم الوكيل فالى خلوا كل حاجه نااااااااااار مفيش فى ايدينا حاجه نعملها لا لينا و لأخواتنا البنات الى زى حاله البنات الى بتحكى عليهم .....بجد حسبنا الله ونعم الوكيل.

شكرا لك أخي الفاضل على مرورك الكريم
مفيش غير الصبر واللجوء إلى الله سبحانه وتعالى والدعاء لبنات المسلمين بصلاح أحوالهم

المشاركة الأصلية كتبت بواسطة nadonido

جميلة يا سارة الحقيقة
بس أنتى عارفة رأى فى موضوع الجواز دة .... زى ما دكتورة فاطمة قالت ، صعب تبقى جوازة و السلام !!

لان للأسف فيه بنات بتفكر اليومين دول انها تتجوز و إنشالله تطلق بعد شهر ، و تأخد لقب مطلقة أحسن من لقب "عانس"
و لا تدرى أنها بتجنى على "زوجها" و على أولادها لو فيه أولاد و على المجتمع كله ... لان الأسرة اللى هى نخاع المجتمع بتبوظ ...


انا شايفة المشكلة اللى خلت البنات تفكر أنها تتجوز و السلام - و تخرب الدنيا بعدها - هى النقطة دى :




لأن فعلا المجتمع لا يحترم ظروف كل بنت أو قرارتها ... و لكنه دائما ما يجرحها باللمزات و التلميحات كما قلتى يا سارة ...

فتلجأ الفتاه للزواج و خلاص و أهو نص الجوازات بقت بتفشل ، فبالنسبة لها أرحم من نظرات الناس لها كعانس...

بس أوعى يا سارة تتجوزى و خلاص

لا يانادين متقلقيش مش هتجوز والسلام
هو كلامك صح بس مفيش حد فينا مثالي صدقيني
مين اللى هتفكر بعد كده لو الجوازة فشلت وجنت على ولادها مش عليها بس كل شخص فينا أناني بيتجوز وخلاص ومش بيعمل حساب بعدين
بس البنات معذروين والله عايزين يخلصوا من كلام الناس دي نظراتهم زي السهام بتكسر قلوب كل
بنت عدت ال 21
دلوقتي ياعيني البنت اللي تتخرج ومش لابسة الدبلة في أيديها اليمين ده إذا مكنتش في الشمال تبقى خلاص راحت عليها ورصيدها في الجواز قل واحتمال إن حد يتقدملها أصبحت ضئيلة
ربنا يستر

المشاركة الأصلية كتبت بواسطة gihan afifi

ههههههههههههههههه
دة إنتى عروسة لقُطة
بس جدعة تخليكى على كلامك
تحفة بجد ياصدفة .. خفة ظلك رهيبة
حبى كله ليكى

ايه رأيك ياطنط جيهان في العروسة دي
بس تعرفي حضرتك أنا أعرف واحدة دكتورة صيدلانية عندها الشقة والعربية ومستعدة تجهز كل حاجة
ومش عايزة غير واحد ابن حلال يصونها ويحافظ عليها وأهلها ناس محترمين جدا
الينات ياعيني بقت غلابة جدا
بتضطر تعمل أي حاجة علشان تلاقي عريس مناسب أو مش مناسب مش مهم
المهم تتجوز وخلاص
فين أيام زمان لما كانت الواحدة تتدخل فرح من دول وتخرج بأربع عرسان
ااااااه كانت أيام حلوة

المشاركة الأصلية كتبت بواسطة dardshash

جميل قوي كلامك وخفه دمك :d
فعلا في بنات كل المشكله عندها في الناس وكلامها يعني الموضوع في حد ذاته مش ازمه بس الناس ولكن مش للدرجه دي تحياتي لكي

شكرا يادردش اش على تشرفيك لموضوعي المتواضع
وعلى كلامك الجميل

المشاركة الأصلية كتبت بواسطة احمد

ماشاء الله عليكى ذهنك حاضر دايما والقصيدة ملمة بأبعاد الموضوع ..مسبتيش نقطة
لمزيد من التألق دائما
وربنا يكرمك يا رب
ونشوفك شاعره كبيييييييييييييييييره جدا

شكرا ياكاتبنا المبدع عن رأيك
وعلى تشرفيك وياااااااارب يسمع منك ربنا وأكون شاعرة معروفة
مش لازم كبيرة أوي يعني أنا مش طماعة

المشاركة الأصلية كتبت بواسطة dr\fatma

ونشوفك عروسة برده يا سارة
قريبا:d

ويارب أشوفك أنتي كمان عروسة يابطوط قريبا
وكل البنوتات

المشاركة الأصلية كتبت بواسطة احمد

ده شىء بديهى طبعا !!
ربنا يكرمكم جميعا باذنه تعالى

اللهم امين
يارب ارزق بنات المسلمين بالأزواج الصالحين

المشاركة الأصلية كتبت بواسطة احمد

ده شىء بديهى طبعا !!
ربنا يكرمكم جميعا باذنه تعالى

[quote[/quote]
اللهم امين
يارب ارزق بنات المسلمين بالأزواج الصالحين

المشاركة الأصلية كتبت بواسطة ياسر شعيب

اين حسن الظن بالله
وصلاة قضاء الحاجه
وكثرة الاستغفار
فيجعل الله لكن من كل ضيق مخرجا
ياسر شعيب
مصر
لكم منى اغلى تحية
الأخوه فى الله

موجود ياأخي الفاضل والحمد لله
بس بنحاول نناقش قضية هامة بل افة كبيرة من آفات المجتمع
بتهدد كيان المجتمع كله
وندعو الله أن ييسر أمر كل انسان في ضيق
شكرا على مرورك الكريم

المشاركة الأصلية كتبت بواسطة سنا البرق

كلام حلو يعنى جر رجل وساعه الجد الشبكه بكام والمهر كام والشقه فين وازاى ووووووووووووووو والى اخره ربنا يرزقك بل الزوج الصالح المناسب وما تكونش جوازه والسلام وماتنسيش تعزمينا

مش جر رجل ولا حاجة ده واقع ياجماعة
أنتوا محسسني أنكوا عمركوا ما شوفتوا بنات كتير بتتنازل وبتجيب الشقة والعربية
والشبكة كمان وبتشارك في الجهاز
فيه بنات كتير بتعمل كده وأكتر من كده كمان
ومبقاش فيه أهالي كتير بتتعنت في طلب الشبكة غير بقى لما بنتهم تكون لسه قطر الجواز مفتهاش
ومتقلقيش ياسنا البرق مش هقبل ان شاء الله بجوازة السلام
لأن أهلي حاطين لائحة شروط أد كده في عريس المستقبل لدرجة إن أي عريس بيترفض يلا مش مشكلة

ما علينا بلا جواز بلا هم
بلا خنقة بلا مشاكل ما بتتلم
بلا جوز بيتمتع بتقل الدم
وعيال عايزة تاكل مم
خلينا كده نستجم

المشاركة الأصلية كتبت بواسطة صدفة سعيدة

مش جر رجل ولا حاجة ده واقع ياجماعة
أنتوا محسسني أنكوا عمركوا ما شوفتوا بنات كتير بتتنازل وبتجيب الشقة والعربية
والشبكة كمان وبتشارك في الجهاز
فيه بنات كتير بتعمل كده وأكتر من كده كمان
ومبقاش فيه أهالي كتير بتتعنت في طلب الشبكة غير بقى لما بنتهم تكون لسه قطر الجواز مفتهاش
ومتقلقيش ياسنا البرق مش هقبل ان شاء الله بجوازة السلام
لأن أهلي حاطين لائحة شروط أد كده في عريس المستقبل لدرجة إن أي عريس بيترفض يلا مش مشكلة

الكلام ده فين
فين الناس دول
دولا للاسف قلة قليلة
وأسالى رأى الشبب
عن الاهالى والمغالاة فى الطلبات
لو كان فى ناس كتير كده
امال ايه سبب العنوسة برأيك؟؟

المشاركة الأصلية كتبت بواسطة صدفة سعيدة

علينا بلا جواز بلا هم

بلا خنقة بلا مشاكل ما بتتلم
بلا جوز بيتمتع بتقل الدم
وعيال عايزة تاكل مم
خلينا كده نستجم

حلوووة